ტელეხიდი საყრდენების გარეშე


საქართველოს მიერ შემუშავებული ახალი სტრატეგიული გეგმა ოკუპირებულ აფხაზეთსა და სამაჩაბლოსთან მიმართებაში ნელ-ნელა ფართო განხილვის საგანი ხდება. მომავალში ეს დოკუმენტი ევროსაბჭოს წარედგინება საბოლოო განხილვისა და შეფასებითვის. თბილისის საერთაშორისო პრესცენტრში („რია-ნოვოსტი“) კი, რუსებმა კიდევ ერთხელ დაიწუნეს პროგრამა და გაგვაფრთხილეს, 10-15 წლით დააგვიანეთ და ამ პროგრამის რეალურად ამოქმედება მაშინ შეგეძლოთ, როცა „ერგნეთის“ ბაზრობა მოქმედებდაო. მათი ოპონენტი სახელმწიფო მინისტრი თემურ იაკობაშვილი ტელე-ხიდის შემდეგაც გაოგნებული ეკითხებოდა თავის აპარატის თანამშრომლებს, ამათ, მგონი, დღემდე ვერ გაუგიათ, დამოუკიდებელი ქვეყანა რომ ვართო.

საქართველოში რუსეთის ყოფილმა ელჩმა ფელიქს სტანევსკიმ იაკობაშვილს პირდაპირ გამოუცხადა: „კავკასიაში უსაფრთხოებას ამერიკა ვერასოდეს უზრუნველყოფს, ისინი თქვენგან ათასობით კილომეტრით არიან დაშორებულები. არადა მიდის პროპაგანდა, რომ იქ მთავარი ძალები არიან ამერიკელები, რომლებიც კავკასიის განვითარებას უწყობენ ხელს. ეს ახალი დოკუმენტიც ამერიკის კარნახით დაიწერა და საქართველოში დამოუკიდებლად ასეთი დოკუმენტის შექმნაზე არავინ წავიდოდა”.

თემურ იაკობაშვილს კი ჩაეცინა, მაგრამ ოპონენტს სრული სერიოზულობით განუმარტა, ამერიკელებმა ამ დოკუმენტის შესახებ მას შემდეგ გაიგეს, რაც საერთაშორისო და ადგილობრივი ექსპერტები ჩაერთვნენ საქმეშიო.

თუმცა, სტანევსკისთვის ამის განმარტება ქართული მხარისგან წყლისნაყვას უფრო ჰგავდა, რადგან იაკობაშვილმა ტელეხიდის დასაწყისშივე გასაგებად თქვა (მაგრამ ეტყობა დსთ-ს ქვეყნების ინსტიტუტის კავკასიის განყოფილების ხელმძღვანელმა „ვერ გაიგო“): „ჩვენს სტრატეგიულ დოკუმენტს საერთო არაფერი აქვს ჟენევის მოლაპარაკებებთან. ჟენევაში რუსულ მხარესთან ოკუპირებულ ტერიტორიებზე დევნილების დაბრუნების საკითხთან დაკავშირებით ვსაუბრობთ. ეს დოკუმენტი კი შიდასახელმწიფოებრივი დოკუმენტია. სხვათა შორის, ის მოიწონა ინგლისმა, საფრანგეთმა, გერმანიამ, ამერიკამ.... კარგი იქნება მოვისმინოთ, რომ რუსეთიც უჭერს მას მხარს. ეს არის დოკუმენტი ადამიანებს შორის ურთიერთობებისთვის და არა -პოლიტიკოსებისთვის. თქვენ ვერაფერს იპოვით იქ, რის პოლიტიზირებასაც შესძლებთ“.

სტანევსკის გაგონებაც არ უნდოდა იმის, რომ აფხაზეთი და სამაჩაბლო ოკუპირებულია რუსეთის მიერ. ოკუპაციის თემას თავისებურად, მაგრამ სტანევსკისგან განსხვავებით, ბევრად უფრო ახლებურად მიუდგა პოსტსაბჭოთა სივრცეში საზოგადოებრივ-პოლიტიკური პროცესების ინფორმაციულ-ანალიტიკური ცენტრის გენერალური დირექტორი ალექსეი ვლასოვი: „მე ყურადღებით გავეცანი ქართული მხარის მიერ მიღებულ დოკუმენტს. სიმართლე გითხრათ, ვფიქრობ, რომ დაგვიანებულია. საქართველოში, როგორც ჩანს, მიხვდნენ, რომ ორივე ტერიტორია დაკარგულია და ახალი განსაზღვრებები მოუგონეს მათ ოკუპიებული ტერიტორიების სახით. უნდა გავიდეს დრო, რომ ახალმა მიდგომამ გაამართლოს. ყველა მხარე ამ საკითხს ისე უნდა მიუდგეს, როგორც სინამდვილეშია“.

„უფროსი თაობის” რუსმა პოლიტიკოსმა სტანევსკიმ კი განაცხადა, ჩვენ ამ საკითხს ასე არ ვუდგებით, აფხაზეთი და “სამხრეთ ოსეთი” ოკუპირებული ტერიტორიები კი არა დამოუკიდებელი რესპუბლიკებიაო. მერე ისიც დასძინა, რომ „ეს ორი სახელმწიფო რუსეთის მოკავშირეა და ამ ხალხს კარგად ახსოვს, რომ არა რუსრეთის დახმარება, მათ საქართველო რასაც უზამდა... კარგი იქნება, ამ ორ დამოუკიდებელ რესპუბლიკასთან თავდაუსხმელობის შესახებ დოკუმენტს ხელი მოაწეროთ“.

მართალია, იაკობაშვილის პასუხმაც არ დაყოვნა, ასეთ დოკუმენტს ხელს რუსეთთან მოვაწერთო, მაგრამ „რია ნოვოსტში” შექმნილი სიტუაცია აშკარას ხდიდა რუსულ და ქართული პოლიტიკის თანხვედრის შეუძლებლობას. ალბათ, ამ ფონზე აუცილებლად არის გასახსენებელი ექსპრემიერ ნოღაიდელის კომენტარი: „რუსეთთან ურთიერთობა აუცილებლად უნდა მოგვარდეს არაფრის ფასად“. რისი იმედი აქვს ექსპრემიერს, როცა რუსეთთან ურთიერთობების მოგვარებას „არაფრის ფასად“ აპირებს, ძნელი სათქმელია.

ამ ტელეხიდის გაანალიზების შემდეგ, შეიძლება ითქვას, რომ რუსეთის დაბალ თუ მაღალ სახელისუფლებო ეშელონებში ანტიქართული გაწყობა ძალიან დიდია და ძნელია კონსტრუქციული დიალოგი თუნდაც ამგვარ ფორმატში. ამავდროულად, სტანევსკი-ვლასოვის პასუხების მაგალითზე, ისიც შეიძლება აღინიშნოს, რომ ქართულ-რუსულ კონფლიქტთან დაკავშირებით თაობათა შორის აზრთა სხვადასხვაობა მაინც იგრძნობა. თუმცა, ექსპერტთა თქმით, სიტუაციას ისიც ართულებს, რომ რუსეთის სახელისუფლებო ეშელონებში მრავლად არიან სტანევსკის მსგავსი „უფროსი თაობის“ რადიკალი პოლიტიკოსები და მათთან შედარებით ჟირინოვსკიც კი ანგელოზია.

ალბათ, ამიტომაც რუსეთთან დიალოგის დაწყება ნაადრევად მიაჩნია ექს-საგარეო მინისტრის, სალომე ზურაბიშვილს.

სხვათა შორის, არაკოსტრუქციულობის თემაზე სტანევსკიმ თავადაც დაიჩივლა – როგორც კი, რაიმე საკითხზე ვიწყებთ საუბარს, ქართული მხარე მაშინვე ემოციურ, არაკონსტრუქციულ პოზიციას იკავებს და ბრალდებებზე გადმოდისო. თან არამარტო რუსული პოლიტიკის, არამედ რუსი ერის სიძულვილშიც „ირიბად“ გვადანაშაულებდა. მისივე თქმით, საქართველოში შევარდნაძის დროიდან არის საომარი და ანტირუსული განწყობა. სტანევსკი ექს-პრეზიდენტის მემუარებსაც გადაწვდა და აღნიშნა, რომ ანტირუსული განწყობა ყველა გვერდზე იგრძნობაო.

თემურ იაკობაშვილი: „ჩვენ არ გვაქვს საომარი განწყობა. არც რუსი ხალხი გვეჯავრება. ნაკლებად უსმინეთ თქვენივე პროპაგანდას და, რაც რეალურია, ის შეამჩნიეთ... რა მოუტანა რუსეთს საქართველოსთან ომმა? ის ხომ არა, კოკოითი ფულებს რომ გპარავთ? რა მოიგო რუსეთმა საქართველოს დასჯით? მეგობრები მოგემატათ? მე ვფიქრობ, ამ მხრივ რუსეთმა სუფთად წააგო. საქართველოსთან ურთიერთობების დამყარებას ნოღაიდელის პარტნიორად არჩევით ცდილობთ? ასეთი ფოკუსებით არაფერი კეთდება. რუსეთი დიდი ქვეყანაა და მჯერა, რომ გონიერება გაიმარჯვებს. ბოდიშით, რომ ემოციებზე გადავდივარ, მაგრამ ჩემთვის სულერთი არ არის როგორ და რას ლაპარაკობენ ჩვენზე რუსეთში. თქვენ რა, ქართველებზე მეტი მტერი არ გყავთ?.. თქვენთვის როგორი საუბარია კონსტრუქციული? გინდათ, ემოციის გარეშე ვისაუბროთ, როცა გვბომბავენ? თქვენ თვითონ ვერ გაგირკვევიათ, რა გინდათ ქართველებისგან”.

შეხვედრაზე არც გუშინდელი რუსეთ-“ოსეთის” უვიზო რეჟიმის შესახებ დადებული ხელშეკრულება დარჩენილა რეაგირების გარეშე. თუმცა, ქართული მხარის პროტესტს, თუ პასპორტებს ურიგებთ და თქვენ მოქალაქეებად თვლით, რაღა ხელშეკრულებებს უდებთო, სტანევსკიმ ასეთი კომენტარი გაუკეთა:

„აფხაზეთსა და ოსეთს რუსეთთან დამალული კი არა, ღია ურთიერთობები აქვთ და დახმარებასაც ღიად იღებენ. უვიზო რეჟიმი რუსეთმა დამოუკიდებელ რესპუბლიკებთან შემოიღოო“.

შემდეგ კი სტანევსკი ქართული სტრატეგიული პროგრამის კრიტიკის ეშხში შევიდა და არც „ერგნეთის” ბაზრობის გაუქმების გადაწყვეტილების გაკრიტიკება დაავიწყდა, ხალხი ორიოდე კაპიკს შოულობდა და ლუკმა პირიდან გამოაცალეთო... ამდენ ხანს რკინიგზა რატომ არ აღადგინეთ, რითაც რუსეთი აფხაზეთის გავლით სომხეთს დაუკავშირდებოდა და იქაურები ეკონომიურად იხეირებდნენო. ერთი სიტყვით, მაგ თქვენი პროგრამის დაწერა 15-20 წლით დააგვიანეთო.

ვალში არც იაკობაშვილი დარჩენია და უთხრა, ამ პროგრამის ფარგლებში ახლაც შეიძლება აფხაზეთში ავტობუსი დაინიშნოს და დანარჩენი საქართველო სოხუმთან დააკავშიროსო. მინისტრის თქმით, როცა ქაშმირში, ამდენი სისხლისღვრის შემდეგ მოხერხდა ავტობუსის რეისის დანიშვნა, რუსული ნება რომ იყოს, ამის გაკეთება აფხაზეთის ავტონომიურ რესპუბლიკაშიც იოლი იქნებოდა. მანვე ისიც აღნიშნა, რომ ივნისის ბოლომდე ქართული მხარე სტრატეგიული გეგმის განსახორციელებელ კონკრეტულ მექანიზმებსაც შეიმუშავებს.

ხოლო საქართველოში არსებული სიტუაციის ახლოს გასაცნობად, სახელმწიფო მინისტრმა ორივე ოპონენტს ბევრჯერ შესთავაზა საქართვე;ლოში სტუმრობა, რაზეც დიდი სიმოვნებით დათანხმდა ვლასოვი. სტანევსკიმ კი გამოაცხადა, მოსკოვიდანაც კარგად ჩანს, რა ხდება საქართველოშიო. თუმცა, ფაქტია რომ თვალთახედვის თვალსაზრისით, მოსკოვიდან თბილისამდე იგივე მანძილია, რაც თბილისიდან მოსკოვამდე და სამწუხაროდ, საქართველოს დედაქალაქიდანაც კარგად ჩანს, რა ხდება მოსკოვში...

[რუსიკო მუმლაძე, presa.ge]
Read more

სარკოზის შეტევა დაემართა


საფრანგეთის სენ მარტენის ტაძრის ერთ-ერთი მღვდელმსახური, მამა არტური უფალს სთხოვს, პრეზიდენტ ნიკოლა სარკოზის გულის შეტევა დაემართოს .

"გაზეტა. რუ"-ს ინფორმაციით, ამის შესახებ მოძღვარმა ჟურნალისტებს თავად განუცხადა, თუმცა მოგვიანებით თავისი გამონათქვამის გამო მწუხარება გამოხატა.

მღველმსახურმა საფრანგეთის შინაგან საქმეთა მინისტრს წერილი მისწერა, რომლის თანახმადაც, პროტესტის ნიშნად უარს აცხადებს ეროვნული ჯილდოს მიღებაზე.

პროტესტი ეხება საფრანგეთის ხელისუფლების გადაწყვეტილებას ქვეყნიდან არალეგალი ბოშების გაძევების თაობაზე. სასულიერო პირი ამ პროცესს ბოშების წინააღმდეგ გაჩაღებულ ნამდვილ ომს უწოდებს.

[ინტერპრესნიუსი]

გაზიარება
Read more

მიშას სისხლი...


სამაჩაბლო, ახალგორის რაიონი, სოფელი ავნევი - კონფლიქტის ზონასთან სიახლოვის მიუხედავად, გაუტეხელი ხალხი და ძლიერი, წელგამართული ოჯახი...
გურამ დავითიძე, როგორც ყველა ჩვენგანი, მომავლის გეგმებს აწყობს და თავდაუზოგავად მუშაობს, მეუღლე სკოლაში მასწავლებლობს, ქალიშვილი ლელა, სტუდენტობისთვის ემზადება... მერე კი, 2008 წლის აგვისტო მოვიდა...

საგურამოს შეაფარეს თავი - მასწავლებელი იქაურ სკოლასაც დასჭირდა, ახალი მეზობლები გულიანად, ქართლურად ამოუდგნენ მხარში.

ჰო, მძიმე დრო უდგას საქართველოს და კიდევ უფრო მოგვიმრავლდა საკუთარი სამკვიდრებლიდან აყრილი ოჯახები, მაგრამ მერე რაო - იკითხავთ, მაინცდამაინც დავითიძეებით რატომ დაინტერესდითო?

...ლელა გადატანილმა სტრესმა მძიმედ დააავადა. დაიწყო ახალი ეპოპეა - ისევ მეზობელ-მოკეთეთა მხარში დგომა: საგურამოს სკოლის მასწავლებლები და მოსწავლეები, ავნევიდან დევნილები, სადაზღვევო კომპანია "ჯი პი აი ჰოლდინგის" თანამშრომლები, სისხლის გადასხმის ინსტიტუტის მთელი პერსონალი - მთავარი ექიმიდან სანიტრამდე, ეს ის ხალხია, ვისაც გურამ დავითიძე გულწრფელ მადლობას ეუბნება ყველაფრისთვის და ძალიან გვთხოვა, რომ ჩვენი გაზეთის ფურცლებიდან გადაგვეცა მათთვის ეს მადლობა...

რამდენიმე დღის წინ სოციალურ ქსელ "ფეისბუკში" განცხადება გამოჩნდა, ახალგაზრდა გოგონას სასწრაფოდ სჭირდება დიდი რაოდენობით მეორე ჯგუფის უარყოფითრეზუსიანი სისხლიო.

მეც ამ იშვიათი ჯგუფის სისხლი მაქვს და მაშინვე დავრეკე, ავადმყოფის დედამ მიპასუხა, გულწრფელი მადლობა გადამიხადა და მითხრა:

- რომ იცოდეთ, რამდენმა დარეკა, როგორ გულთან მიიტანეს ჩვენი გასაჭირი. სისხლი ყოველდღე გვჭირდება, მაგრამ ხვალ ვინც უნდა მოვიდეს, უკვე გაფრთხილებულია, თქვენამდე დარეკეს, თქვენ ზეგისთვის შეგაწუხებთ თუ შეიძლება, ყველას დიდი მადლობა...

მეორე დღის პირველ საათზე ჩემმა ტელეფონმა დარეკა და ქალბატონის მორიდებული ხმა გაისმა:
- ბოდიშს გიხდით, მაგრამ სისხლის ჩაბარებას რომ დაგვპირდით ხვალისთვის, იქნებ ახლა მოახერხოთ... ორ საათამდე მუშაობს სისხლის გადასხმის სადგური... დღეისთვის ვინც ჩაეწერა, არ... ვერ მოვიდა... (!!!!!)

რა არის ეს, ბატონებო?! რა ჰქვია ამას?! ვის უნდა ვკითხოთ ასეთი საქციელის ახსნა?! ფსიქოლოგებს, ფსიქიატრებს თუ ყველა ჩვეულებრივ ადამიანს, ვინც ოჯახში ისწავლა მიცემული სიტყვისა და მოყვასისთვის გაწეული უანგარო დახმარების ფასი?!

სამი დღე გავიდა და ვერაფრით გადამიარა გაბრაზებამ - ძალიან მთხოვა ლელას მამამ, ბატონმა გურამმა, არავისთვის საყვედური არ მეთქვა და პირიქით - მადლობა გადამეხადა ყველა უანგარო დონორისთვის, მაგრამ ბოდიშს ვუხდი და ვერ ვუსრულებ ამ თხოვნას:

თქვენ მოგმართავთ - ყველას, ვინც კომპიუტერთან მიმჯდარი გულზე მჯიღს იბრაგუნებთ და ათასგვარი "სიბრძნეების" გავრცელებით ირთობთ თავს; "კლავიატურის ლომებო" - რბილი სავარძლიდან ერთი ადგილის წამოუწევლად რომ გინდათ ომის მოგებაც და ქვეყნის აშენებაც; ყველას, ვინც ე.წ. "ნიკს" ამოფარებული "ვირტუალურ კუნთებს" ათამაშებს, არ გრცხვენიათ, ადამიანს სისხლს შეჰპირდით და გადააგდეთ?!

P.S. ამ ამბავს ერთი "კარგი სიახლეც" ახლდა: სისხლის გადასხმის სადგურში მომილოცეს - ჩვენი პრეზიდენტის ჯგუფის სისხლი გქონიათო!.. საიდან იცით, თავი მომიკვდეს, რამე ხომ არ შეემთხვა, სისხლი ხომ არ დასჭირდა-მეთქი? არა, აქ ყოველთვის გვაქვს "საპრეზიდენტო რეზერვი", რამდენი-მეთქი და - "ბევრი ლიტრიო"...

ბატონო მიხეილ, მესმის რომ "საპრეზიდენტო რეზერვი" აუცილებელია, მაგრამ გთხოვთ, გაეცით განკარგულება, რომ თუკი აუცილებელი გახდა, "თქვენი სისხლი" გასაჭირში მყოფს "ასესხონ", გაძლევთ პირობას, რომ მეორე დღესვე მე ჩაგასესხებთ!

მკითხველს კი ვეტყვი, რომ სანამ ბატონი პრეზიდენტი "გვასესხებს", ლელას მუდმივად სჭირდება სისხლი. გულისხმიერი ადამიანები მის ოჯახს დაუკავშირდნენ ტელეფონზე:

(8 99) 67 55 63
[ზვიად გურული, "კვირის პალიტრა"]


გაზიარება
Read more

ცხინვალისთვის გადარიცხვა


რუსეთის მიერ ოკუპირებული ცხინვალის რეგიონისთვის გამოყოფილი თანხების აორთქლებაზე ბევრი ითქვა და ყველას ჩამოთვლა შორს წაგვიყვანს. აღმოჩნდა, რომ მოსკოვური მილიარდების გადმორიცხვა დღემდე მხოლოდ ქაღალდზე ხდება. ცხინვალს იმ 4.3 მილიარდი რუბლიდან, რომლის გადარიცხვის შესახებ ინფორმაცია მოსკოვმა უკვე მთელ მსოფლიოს მოსდო, ჯერ ერთი კაპიკიც არ მიუღია.

თვად ცხინვალელების აღიარებით, „ყველაფერი გაკეთებულია იმდენად უხეიროდ, რომ დღეს 70 მრავალსართულიან სახლში წყალი კედლებს მოყვება (ცხინვალში ყოველ ღამე წვიმს), ნესტია და სოკოა გაჩენილი ასობით ბინაში. იყო ფაქტები, როდესაც ხურავდნენ სახლებს და სამუშაოს მოცულობას არა 2–3–ჯერ, არამედ 20–ჯერ ზრდიდნენ. ამის შედეგად მინიმუმ 70 კორპუსის სახურავი ხელახლა გადასახურია. ყველაფერი შესაკეთებელია. ადგილობრივ მთავრობას არ შეუძლია ამ ფულის გამოყოფა და ვინ იცის, რა ღირდა ეს რემონტი. სამუშაოები ხომ არავის ჩაუბარებია. ცხადია, იპარავენ მოსკოვის დონეზე“.

“გადის დრო, და ხან ჩვენი აფხაზი, ხანაც ოსი სეპარატისტები ნებსით თუ უნებლიედ თავად გვიყვებიან სიმართლეს ტაბუდადებულ საკითხებზე და თანდათან ისეთ რამეებს ამბობენ, კაცს დაკითხვაზე რომ არ წამოცდება”, – აცხადებენ საქართველოს „ექსპერტთა კლუბში“.

ექსპერტთა თქმით, იმდენი ითქვა და დაიწერა რუსეთის მიერ ოკუპირებული ცხინვალის რეგიონისთვის გამოყოფილი თანხების აორთქლებაზე, რომ ყველას ჩამოთვლა ნამდვილად შორს წაგვიყვანს. თითქოს კიდევ რა უნდა თქმულიყო, მაგრამ ისევ ცხინვალელები გვეხმარებიან – ეტყობა, ისინიც დაიღალნენ ამდენი ტყუილით. საქმე ისევ ცხინვალში აუშენებელ მშენებლობებს ეხება.

“ამჯერად სინდისის ქეჯნის მსხვერპლი ცხინვალის „მერი“ გერასიმე (რეზო) ხუგაევი გახდა. საკუთარ თანამოქალაქეების წინაშე ალბათ სინდისი სუფთა რომ ჰქონოდა, მას მოუწია იმ საიდუმლოებებისთვის ფარდის ახდა, რომელსაც კოკოითის რეჟიმი და კრემლი, ერთად დიდი ხანია მალავენ, – ამბობს „ექსპერტთა კლუბის“ წარმომადგენელი ირაკლი ცქიტიშვილი.

ხუგაევის თქმით, მიუხედავად იმისა, რომ რუსეთი ასე იკვეხნის ცხინვალისთვის მილიარდების გადარიცხვას, აღმოჩნდა, რომ ეს ყველაფერი მხოლოდ ქაღალდზე ხდება. ხუგაევი აცხადებს, რომ ცხინვალს, იმ 4.3 მილიარდი რუბლიდან, რომლის გადარიცხვის შესახებ მოსკოვმა უკვე მთელ მსოფლიოს მოსდო ინფორმაცია, ჯერ ერთი კაპიკიც არ მიუღია.

„უფრო მეტს გეტყვით – დანგრეული საცხოვრებლებისა და ინფრასტრუქტურის აღსადგენად ქაღალდზე გამოყოფილია 7 მილიარდ რუბლზე მეტი – და ამ თანხიდან არც ერთ რუბლი არ არის. ეს კი რუსეთის შარშანდელ ბიუჯეტში იყო ჯერ კიდევ ჩადებული! დღეს მთელი რესპუბლიკა ცხოვრობს იმ გარდამავალი ნარჩენებით, რომლის ეკონომიაც ჩვენ მოვახერხეთ შარშან – დაახლოებით ერთი მილიარდი რუბლი“, – დასძენს ხუგაევი, გამოცემა „RUSNORD“–ისთვის მიცემულ ინტერვიუში.

ხუგაევი ხელს პირდაპირ რუსეთს ადებს და აცხადებს, რომ „რუსეთის ფინანსური წრეების რაღაც დონეზე ფული იკარგება: ფაქტიურად, რუსეთის ხელმძღვანელობა ფულს უგზავნის სამხრეთ ოსეთს, ის კი აქამდე ვერ აღწევს...“

„ექსპერტთა კლუბის“ მიერ აღწერილ ფულის გათეთრების სქემებს ხუგაევიც ადასტურებს. მისი თქმით, რუსეთის უწყებებს საკუთარი პროექტები და ამოცანები აქვთ და ნაკლებად აინტერესებთ ცხინვალის პოზიცია და საღი აზრი.

„მე რომ შემეძლოს, პირადად დალაპარაკება რუსეთის რეგიონალური მართვის მინისტრთან ბასარგინთან, მე ვკითხავდი მას, რატომ არის, რომ ფული საცხოვრებელი სახლების აღდგენაზეა მიმართული, ხოლო ხალხი კი ჯერაც კარვებში ცხოვრობს? რატომ არ შეგვიძლია აღვადგინოთ მათი სახლები აგერ უკვე ორი წელია, მაშინ როცა ძალიან ადვილად იწყებენ მილიარდიანი პროექტების რეალიზებას, რომელთაც რეგიონალური მართვის სამინისტრო თვითონ პოულობს, თავს გვახვევენ მათ ჩვენ საღი აზრის საწინაამდეგოდ? და ეს ყველაფერი კეთდება ხელისუფლებასთან შეუთანხმებლად – სამუშაოს შემსრულებლები რაღაც სამუშაოების წარმოებას იწყებენ, მე კი ამაზე ვერავითარ გავლენას ვერ ვახდენ“, – ამბობს ხუგაევი და მოჰყავს რამოდენიმე მაგალითი იმისა, თუ როგორ იპარავენ რუსული უწყებები ფულს.

„ექსპერტთა კლუბი“ წერდა იმის შესახებ, თუ როგორი ნახა ცხინვალი რადიო „ეხო მოსკვის“ ჟურნალისტმა, როდესაც ის რუსეთის ვიცე–პრემიერს იგორ შუვალოვს ახლდა ცხინვალის რეგიონსა და აფხაზეთში ვიზიტისას. ცხინვალში გაკეთებული საქმეების აღწერისას მან განსაკუთრებით აღნიშნა, რომ მთელი ცხინვალი ახალი სახურავებითაა გადახურული.

ხუგაევმა კი ამ სახურავებსაც „ლაფი გადაასხა“. მისი განცხადებით, რუსეთის რეგიონალური მართვის სამინისტროს შეკვეთით 2008–2009 წელს ყველა მრავალსართულიანი სახლი გადაიხურა, თუმცა სასიხარულოდ ცხინვალის მოსახლეობას საქმე არა აქვს იმიტომ, რომ „ამ სახურავების 90% წყალს უშვებს, და ხალხი საჩივლელად ჩემთან მოდის, მათთვის სულ ერთია, რომ ეს ყველაფერი ჩემთან შეუთანხმებლად კეთდებოდა“.

„საბოლო ჯამში – ყველაფერი გაკეთებულია იმდენად... (ხუგაევი აქ პაუზას აკეთებს, ცდილობს რა შესაბამისი სიტყვა მოძებნოს –„RUSNORD“) უხეიროდ, რომ დღეს 70 მრავალსართულიან სახლში წყალი კედლებს მოყვება (გამოცემა აღნიშნავს, რომ ცხინვალში ყოველ ღამე წვიმს), ნესტია, სოკოა გაჩენილი ასობით ბინაში!!! (...) იყო ფაქტები, როდესაც ხურავდნენ სახლებს და სამუშაოს მოცულობას არა 2–3–ჯერ, არამედ 20–ჯერ ზრდიდნენ!!! აი ამ მინიმუმ 70 კორპუსის სახურავი ხელახლა გადასახურია. გამოსაყოფია დაახლოებით 1 მილიონი, რომ ყველაფერი შეკეთდეს... არ შეუძლია ახლა მთავრობას ამ ფულის გამოყოფა... და ვინ იცის, რა ღირდა ეს რემონტი... სამუშაოები ხომ არავის ჩაუბარებია... და იპარავენ მოსკოვის დონეზე“, – აცხადებს შეწუხებული „მერი“.

საბოლოო ჯამში ხუგაევმა თავისი „პრეზიდენტი“ დაინდო და ყველაფერი მოსკოვს გადააბრალა. ნახა თუ არა მომენტი, თავიანთ უხეირობაში პუტინის მიერ გამოგზავნილი „ჩელიაბინსკელი ტურისტები“ დაადანაშაულა.

ხუგაევის თქმით, კოკოითს ბევრჯერ განუცხადებია, რომ მისი სურვილის წინააღმდეგ, „ადგილი აქვს სამხრეთ ოსეთის, შავ ფინანსურ ხვრელად გადაქცევის მცდელობას“. არ ვიცით, როდის განაცხადა ასეთი რამ კოკოითმა, რადგანაც ის თვითონაც ნამდვილად არაა წინააღმდეგი ამ „შავ ხვრელში“ ჩაიძიროს, სამაგიეროდ ქართულ მხარეს მრავალჯერ აღუნიშნავს, რომ ოკუპირებული ტერიტორიები რუსეთის დიდი ფინანსური შავი ხვრელია, და არა მარტო ფინანსური – იარაღისა და ნარკოვაჭრობის ტრაფიკიც მათზე გადის, – აცხადებს „ექსპერტთა კლუბი“.

ხუგაევმა არ დაინდო ცხინვალის რეჟიმის ჩელიაბინსკელი „პრემიერ–მინისტრიც“. მას და მისი გუნდის წევრებს ცხინვალის „მერმა“ რუსეთის რეგიონალური მართვის სამინისტროს მიერ გამოგზავნილი „ტურისტები“ უწოდა, რომელთაც საკვანძო თანამდებობები უკავიათ.

„ისინი ყველანი ჩელიაბინსკის რაიონის პატარა ქალაქ ოზერსკიდან არიან. ეს ათეულობით ჩინოვნიკი – სულ შემთხვევითი ხალხია, მათ არასოდეს უმუშავიათ სახელმწიფო სტრუქტურებში. არცერთმა მათგანმა არ იცის რა არის სახელმწიფო სამსახური“, – აცხადებს ხუგაევი და აქვე დასძენს, რომ „ოზერსკის მთავრობის“ მიერ კურირებულ ათეულობით, ასეულობით თუ არა, ობიექტებთან დაკავშირებით აღძრულია მრავალი საქმე, სამუშაოების ბევრი შემსრულებელი ძებნაშია, თუმცა თვითონაც კარგად იცის, თუ სად იმალებიან ისინი – თავიანთ ოზერსკში.

ხუგაევს კი უგრძვნია, რომ ასე ცხოვრება მეტი აღარ შეიძლება, მაგრამ ეტყობა ისიც კარგად იცის, რომ თუ რუსეთი ხელებს ვერ მოითბობს მათ უბედურებაზე, შესაძლოა სულაც დაკარგონ თავიანთი ფსევდო–დამოუკიდებლობა. ამიტომაც ხუგაევმა განაცხადა: „ცუდი იქნება, თუ ამ მონაცემებით ვინმე მანიპულირებაბს მოახდენს და შეეცდება ჩვენი ხალხების გადამტერებას“–ო.

აღსანიშნავია, რომ ოსური ოჯახები, რომლებიც მიწისძვრისა და რუსული არტილერიისა და ავიაციის დაბომბვის შედეგად უსახლკაროდ დარჩნენ, დღესაც ღამეს ლამის ღია ცის ქვეშ ათენებენ. ცხინვალის მცხოვრები ვიტალი თედეევი ყვება, რომ ომის შემდეგ მასთან დაღესტანელები მივიდნენ და წარმოადგინეს თავი ერთ–ერთი სამშენებლო კომპანიის წარმომადგენლებად. აიძულეს თვით მაცხოვრებლები გაეწმინდათ ბინა ნანგრევებისაგან და მას შემდეგ არაფერი გაკეთებულა. ამიტომაც თედეევს უწევს სხვის ბინაში ცხოვრება, და არ იცის, როდის ჩამოვლენ ბინის პატრონები და როდის მოუწევს მას ქუჩაში ძილი.

“ამასობაში კი მარიონეტული რეჟიმის ლიდერი ედუარდ კოკოითი ხმამაღალ განცხადებებს აკეთებს რუსეთში ხანძრების შედეგად უსახლკაროდ დარჩენილი მოსახლეობისათვის დახმარების გაგზავნის შესახებ. სააგენტო „РЕС“–ის ინფორმაციით, კოკოითის მთავრობა სპეციალური ანგარიშიდან გამოუყოფს 12 მილიონ რუბლს ნიჟნი ნოვგოროდის დაზარალებულებს. საინტერესო ცინიზმია საკუთარი ხალხის მიმართ, არა? თითქოს ცხინვალის რეჟიმი აფინანსებს კრემლს, და არა პირიქით.

საქმე კი უფრო მარტივადაა – ეს ის 12 მილიონია, რომელიც ცხინვალმა ვითომ მიიღო და რომელსაც ვითომ დაზარალებულებს დაახმარს. ეს ყველაფერი - ქაღალდზე. საბოლო ჯამში კი რუსეთის მთავრობა 12 მილიონ რუბლს ჩამოჭრის ცხინვალისთვის ვითომ გამოყოფილი თანხიდან. ესეც ქაღალდზე. რუსები დახმარებას მაინც არ მიიღებენ, კოკოითი კრემლს წილს დაუბრუნებს და თანაც დახმარებაში ჩაეთვლება, რეგიონალური მართვის სამინისტრო ამ ფულს „გააპრავებს“ და ყველა კმაყოფილი დარჩება გარდა იმ მართლა გაჭირვებული ადამიანებისა რუსეთსა და ცხინვალის რეგიონში, რომელთაც კიდევ დიდი ხნის განმავლობაში ვარსკვლავთმრიცხველის პროფესიის ათვისება მოუწევთ”, – აცხადებენ „ექსპერტთა კლუბში“.

[გეგა ბერიძე, presa.ge]
Read more

"ვერაფერი მაიძულებს.."


„ინტერნეტ მედია კლუბმა“, რომელიც „კავკასიის ინტერნეტ მედია ჯგუფის“ ბაზაზე არჩევნებამდე რამდენიმე დღით ადრე შეიქმნა, ირაკლი ალასანიას შემდეგ „ქრისტიან–დემოკრატიული მოძრაობის“ საარჩევნო სიის პირველ ნომერს, ინგა გრიგოლიას უმასპინძლა.

ძირითადი შეკითხვები მედიის მხრიდან სოციალურ თემებთან დაკავშირებით დაისვა, რადგან სწორედ ეს იყო მთავარი მესიჯი თარგამაძე–გრიგოლია–ჭანტურიას საარჩევნო ბლოკისა. ერთ–ერთი მთავარი თემა იყო საკრებულოში მოხვედრილი ოპოზიციური პარტიების წევრთა ერთობლივი მუშაობის საკითხიც.

აწ უკვე დედაქალაქის საკრებულოს წევრსა და ყოფილ ჟურნალისტს ოპოზიციური სავარაუდო ერთობის იმედი აქვს, მისი თქმით, მიუხედავად წინასაარჩევნოდ სხვა ოპოზიციური პარტიების მხრიდან „ქრისტიან–დემოკრატების“ მისამართით უწყვეტი კრიტიკისა, ის ფიქრობს, რომ საკრებულოში შესაძლოა შედგეს ერთობა რიგ საკითხებზე.

მან ზუსტად იცის, რომ „ქრისტიან–დემოკრატებს“ ექნებათ ფრაქცია, თუმცა გამორიცხავს ყოველგვარ ხელოვნურ გაერთიანებებს ბლოკების სახით, – „ერთობლივი მუშაობა გვექნება ყველა საჭირბოროტო საკითხზე, მათ შორის „ეროვნული საბჭოს“ წარმომადგენლებთანაც, რადგან ჩემთვის კახა კუკავა და კობა დავითაშვილი არ არიან ნოღაიდელის სახეები, რაც შეეხება ნოღაიდელს, ჩვენი მხრიდან მისი კრიტიკა გამოწვეულია იმით, რომ ის წლების განმავლობაში იდგა სააკაშვილის გვერდით და იმ მთავრობის გვერდით, რომელიც ქვეყნის ბედს წყვეტდა“.

უფრო ვრცლად სოციალურ თემებზე სასაუბროდ მან იმ ადამიანების სტუმრად მოწვევა შემოგვთავაზა, ვინც უშუალოდ დაწერა „ქრისტიან–დემოკრატების“ საარჩევნო პროგრამა, რაც შეეხება სატარიფო სისტემის ცვლილებებს, გაზთან, ელექტროენერგიასთან და წყალთან მიმართებაში, მისი აზრით ამაზე უფრო დაწვრილებით გია ჭანტურიას მოწვევა იქნება უპრიანი.

კითხვაზე, არის თუ არა ზეწოლა კერძო კომპანიების იძულება დაწიონ გადასახადები სხვადასხვა მომსახურებაზე, იმ შემთხვევაში თუ „ქრისტიან–დემოკრატები“ მოვლენ ხელისუფლებაში და ხომ არ გადაწყვეტენ ამის შემდეგ ინვესტორები, რომ ქვეყნა არასაიმედო ბიზნეს–პარტნიორია, გრიგოლია აცხადებს, რომ სატარიფო ცვლილებები, სწორედ რომ ბიზნესის განვითარებას შეუწყობს ხელს და მანამდე არსებობდა ხელშეკრულებები, რომელზეც ერთ–ერთი ხელისმომწერი სწორედ ჭანტურია გახლდათ, სადაც ნათლად იყო გაწერილი, რომ გაზი 10 თეთრზე მეტი არ უნდა ღირდეს.

რაც შეეხება არჩევნების შედეგებს, მიუხედავად იმისა, რომ „ქრისტიან–დემოკრატებმა“ მეორე შედეგი აჩვენეს, ინგა გრიგოლია ამბობს, რომ არც მათ და არც სხვა ოპოზიციურ პარტიებს არ აქვთ საზეიმოდ საქმე. რაც შეეხება მილოცვებს, რომლიც გიგი უგულავას მისამართით ჭანტურიასა და ალასანიას მხრიდან გაისმა, ინგა ამბობს, რომ ეს დიდი პოლიტიკური კულტურის გამოვლინებაა, რომლითაც თავად ვერ დაიკვეხნის, „ვერაფერი მაიძულებს ვაღიარო „ნაციონალური მოძრაობის“ შედეგები, ამხელა პროცენტის არ მჯერა“.

რაც შეეხება ამ ბოლო დროს გახშირებულ საუბრებს ვადამდელ საპარლამენტო და საპრეზიდენტო არჩვენებზე, ინგა გრიგოლიას აზრით, ამ ეტაპზე არანაირი მუხტი ასეთი პროცესების დასაწყებად არ შეინიშნება.

„თუ ხელისუფლება უხეშად რომ ვთქვათ, ისევ აბოლებს ხალხს და არ აპირებს ითანამშრომლოს სხვადასხვა პოლიტიკურ თუ სოციალურ თემებთან დაკავშირებით ოპოზიციასთან, მაშინ შეიძლება წამოვიდეს საამისო მუხტი, მაგრამ ბოლო აქციებმა, სადაც 300 კაცამდე მივიდა და არჩევნების შედეგებმა, აჩვენა, რომ ახლა ამის დრო არ არის. თუ გიგი უგულავა აპირებს, როგორც თავად განაცხადა, სხვადასხვა ოპოზიციურ პარტიებთან თანამშრომლობას და ეს არი იყო პიარ–განცხადება, ქვეყნისთვისაც კარგი იქნება, რომ ყველაფერი პოლიტიკური დებატებით საკრებულოსა და პარლამენტში გადაწყდეს და ამაში დაგვეხმაროს ხალხის ნება, ვიდრე ვიაროთ ისევ აქციების გზით. თუმცა, გამორიცხული არაფერია.

ინგა გრიგოლიას იმედი აქვს, რომ საკრებულო გადაიქცევა ბრძოლის სერიოზულ იარაღად ქალაქში და ქვეყანაში ბევრი პრობლემის გადაწყვეტისთვის, რადგან ოპოზიცია მიხვდა, რომ საპარლამენტო არჩევნების ბოიკოტირებამ არაფერი მოიტანა. „ვფიქრობ, რომ გაჩეჩილაძე, დავითაშვილი, ბესელია და სხვები რომ შესულიყვნენ პარლამენტში, ბევრი ცუდი შედეგის თავიდან აცილება შეიძლებოდა“.

[მაცაცო კევლიშვილი, presa.ge]


გაზიარება
Read more

ვანომ ინტერვიუ "მისცა"


გასულ კვირას მედიასაშუალებების განხილვის მთავარი თემა ვანო მერაბიშვილის მიერ "კომერსანტისთვის" მიცემული სკანდალური ინტერვიუ იყო. მართალია, ბატონი ვანო ამბობს, რაღაცები დამიმახინჯესო, მაგრამ, თავის მხრივ, ჟურნალისტი აცხადებს, კი არ დავამახინჯე, ვერ გავიგეო.

ასეა თუ ისე, მერაბიშვილმა უკვე დაანონსა, არჩევნებში 64 პროცენტს ავიღებთო და ძნელად, რომ მან საკუთარი ანონსი უკან წაიღოს. ყველაზე მეტად ის გამიკვირდა, მერაბიშვილის სიტყვებს - კანონის შეცვლა რა საჭიროა, როგორც გადავწყვეტ, ისე იქნებაო, ხმაური რომ მოჰყვა. ოპოზიციამ ერთი ამბავი ატეხა - ხედავთ, ეს კაცი რას ამბობსო და თქვენი გამკვირვებია, ბატონებო - აქამდე სხვანაირად იყო, არ ვიცოდით, თუ მაინცდამაინც უნდა ეთქვა, კანონი მე ვარო?

მიხეილ სააკაშვილი ზაფხულის წვიმასავით აქტიური იყო და მაშინ, როცა დახურულ დარბაზში მეკლდეურობაში საქართველოს ჩემპიონატი ტარდებოდა, ბატონმა მიხეილმა პირდაპირ შუა ქალაქში ჩაგვიტარა მასტერკლასი და ხარაჩოზე მკვირცხლად აძვრა, ბოლოში გაუჭირდა, მაგრამ მაგაზე ნუ ინერვიულებთ, ბატონო პრეზიდენტო, სიმაღლეზე ასვლა იოლი არასდროს არის და ყოველთვის ბოლოში ჭირს.

ჰოდა, დავინახე სააკაშვილი ხეზე აცოცებული და მაშინვე ის გამახსენდა, ანალოგიური რამ დიმიტრი მედვედევმა შარშან რომ გააკეთა, თუმცა მაშინ ის მართლა ხეზე ავიდა, გაყინულ ხეზე. იმ სიმაღლეს ვერ უწია, როგორსაც სააკაშვილმა, რადგან ხე თოვლით იყო დაფარული, თუმცა უკვე თამამად შეგვიძლია ვუთხრათ რუსებს - "თქვენი და ჩვენი პრეზიდენტები ადიოდნენ ხეზე, რომელი ჩამოვარდება, ვნახავთ არჩევნებზე".

პრეზიდენტმა გმირთა მოედანზე მიმდინარე მშენებლობაც დაათვალიერა და აღნიშნა, როცა ამ ხიდის მშენებლობა დავიწყეთ, ჯერ მიტინგი მოგვიწყვეს, მერე წყალი გადმოგვასხეს, გვაგინეს და ბოლოს თოფიც გვესროლეს, მაგრამ ჩვენ არ გავჩერდებით, დაე, იმათმა ისევ გვაგინონ, წყალი გადმოგვასხან და თუნდაც გვესროლონო.

ყველაზე საინტერესო კი წინ გველოდა. მტკვარზე, როგორც იქნა, იტალიელი არქიტექტორის მიერ დაპროექტებული ხიდი გადეს და განაცხადეს, ამ ხიდს ყოველდღიურად 50 ათასი ნათურით გავაბრდღვიალებთო, სააკაშვილმა კი სიამაყით აღნიშნა, ეს არქიტექტორი ნამდვილ პროფესიონალად სწორედ აქ ჩამოყალიბდაო. არადა, კაცი ორმოცდაათს გადაცილებულია და თუ აქ ჩამოყალიბდა, კარგად გვქონია საქმე.

აი, იმ ნათურებზე კი მაშინვე წეროვანის ლტოლვილები გამახსენდა, საერთო ჯამში, ხუთი ათასი ნათურაც რომ არ უნთიათ და ხელისუფლება კაპიკ-კაპიკ რომ უთვლის და მიცემულ დახმარებას პრაქტიკულად დენსა და გაზში ახდევინებს...

საქართველოში ახალი ორდენი დაწესდა და მას სააკაშვილმა ბრწყინვალების ორდენი უწოდა. ეჭვი მაქვს, ღირსების ორდენები, უბრალოდ, გამოილია და ამიტომ ახლის დაწესება გახდა საჭირო. პრეზიდენტმა ორდენი მშენებელს დაჰკიდა და განაცხადა, აქამდე დათო მშენებელი იყო, ახლა კი დავით-ბრწყინვალეაო.

ვერ გეტყვით, კარგია თუ არა, მეფეთა ტიტულებს ასე რომ ვარიგებთ, მაგრამ თუ დარიგებაა, ბოლომდე დარიგება იყოს - დავაწესოთ ზაქიჭამიას ორდენი და თუ გგონიათ, იმაზე ნაკლები დაგვჭირდება, ვიდრე ღირსების ორდენები ჩამოვარიგეთ, ძალიან ცდებით. თანაც, არც საწყენი იქნება, ბოლოს და ბოლოს, მეფეს ეძახდნენ. აი, მეფეზე კი ისევ ვანო გამახსენდა, ბაგრატიონების შთამომავალი რომ არის თურმე და... რაღა და? ბაგრატიონების სიტყვაც კანონი იყო.

პარალელურად, ხელისუფლების ერთ-ერთმა სახემ, ზურაბ მელიქიშვილმა განაცხადა, მერობის კანდიდატის წარდგენის უფლება 30 აპრილამდე გვაქვს და წინასწარ არ ვიტყვი, ვის დავასახელებთო. ვერ გეტყვით, რას გეგმავენ ნაციონალები, მაგრამ ფაქტია - სერიოზული კონსულტაციები მიმდინარეობს და გიგი უგულავა შესაძლოა სულაც არ გამოდგეს საარჩევნო სპექტაკლის მთავარი გმირი.

თუ გახსოვთ, წინა საპარლამენტო არჩევნებზე სწორედ უგულავამ თქვა პირველად, პირობას გაძლევთ, ჩვენი სიის პირველი ნომერი ნინო ბურჯანაძე იქნებაო და საბოლოოდ პირველობა დავით ბაქრაძეს ერგო. ჰოდა, თუ უგულავას ვინმე გულიანით ჩაანაცვლებენ, არ უნდა გაგვიკვირდეს.


[”ყველა სიახლე”, არმაზ ხარძიანი]



გაზიარება
Read more

მიტოვებული ლტოლვილები


დღეს, 26 მაისს, ზუგდიდის მთავარ მოედანზე დევნილების მხარდასაჭერად მსოფლიოში ცნობილი ვარსკვლავებისა და ქართველი მუსიკოსების კონცერტი გაიმართება. საინტერესოა, გრანდიოზული კონცერტის ფონზე რა პირობებში უწევთ ცხოვრება იძულებით გადაადგილებულ პირებს სამეგრელო–ზემო სვანეთში, რაც დღეს საქართველოს მრავალი რეგიონიდან ჩამოსული, დევნილის სტატუსის მქონე ადამიანები მათ მხარდასაჭერ კონცერტზე შეიკრიბებიან. ამ კონცერტის გარდა, რით უჭერს მხარს მათ ხელისუფლება? ერთ პატარა ქალაქში 26 მაისს ორი რეალობა შედგება.

ზუგდიდის მუნიციპალიტეტში არსებული 45 კორპუსიდან, რომელშიც აფხაზეთიდან დევნილები 17 წელია ცხოვრობენ, 32-ის სარეაბილიტაციო სამუშაოები უკვე დასრულებულია. მართალია, კორპუსების ფასადები შეიღება და გალამაზდა, მაგრამ, როგორც დევნილები ამბობენ, ოთახები საცხოვრებლად თითქმის გამოუსადეგარია. მათი თქმით, ჭერიდან და კედლებიდან გამოჟონილმა წვიმის წყალმა და მეზობელ კორპუსებში რემონტის მიმდინარეობამ გარემონტებულ ოთახებშიც ბზარები გააჩინა. უფრო მეტიც, დევნილები, დიდი ხანია, კორპუსებში წყლისა და კანალიზაციის პრობლემის მოგვარებას და ოჯახისთვის კუთვნილი ფართობის გამოყოფას ითხოვენ. ერთ-ერთი ასეთი კომპაქტური დასახლება სოფელ ინგირის მეურნეობის უბანშია. იქ აფხაზეთიდან დევნილი 40 ოჯახი ცხოვრობს.

ასეთ პირობებში ცხოვრობენ სოფელ რუხის ყოფილი უნივერმაღის კორპუსში ჩასახლებული გალელები, სოხუმელები და ოჩამჩირლები.

“ჩვენ საკმარისი ფართის გამოყოფას ვითხოვთ. საშინელი პირობები გვაქვს, არ არის წყალი, ელექტროენერგია, საძირკველში ფეკალური მასებია ჩასული და ორ მეტრზეა დაგუბებული. გვპირდებიან და გამკეთებელი არავინაა,” – ამბობენ დევნილები.

კომპაქტურ დასახლებებში მიმდინარე და ზოგან უკვე დასრულებული რემონტი არაერთხელ დაათვალიერეს როგორც ქვეყნის პრეზიდენტმა, ისე ლტოლვილთა და განსახლების მინისტრმა სამეგრელოში ვიზიტისას. თუმცა, როგორც დევნილები ამბობენ, არავის უთქვამს მათთვის, როდის მოუგვარებენ წყლისა და კანალიზაციის პრობლემას.

იძულებით გადაადგილებულ პირთა მიმართ სახელმწიფო სტრატეგიის სამოქმედო გეგმა კოლექტიური ცენტრების რეაბილიტაციასა და დევნილი ოჯახებისათვის სიმბოლურ ფასად (ერთ ლარად) მათ საკუთრებაში გადაცემას ითვალისწინებს.

ამავე გეგმის მიხედვით, “რეაბილიტაციის სტანდარტებისა და კრიტერიუმების შექმნაზე მუშაობისას მხედველობაში იქნება მიღებული მუნიციპალური განვითარების ფონდის მიერ გამოყენებული სტანდარტი, რომლის მიხედვითაც, საცხოვრებელი ფართის სიდიდე საშუალოდ შეადგენს 40 კვადრატულ მეტრს საშუალო სიდიდის ოჯახზე (3-4 ადამიანი).

როგორც წესი, ყოველ ოჯახს ექნება საკუთარი სანიტარული კვანძი. იქ, სადაც ფართი არ იძლევა ხსენებული სტანდარტის დაკმაყოფილების საშუალებას, სავარაუდოდ, ორ ან მეტ ოჯახს ექნება საერთო სველი წერტილი. რეაბილიტაციის პროცესთან დაკავშირებული გადაწყვეტილებები მიღებულ იქნება დევნილთა ინტერესების მაქსიმალური გათვალისწინებით და დევნილების მონაწილეობით.

თანხები, ძირითადად, აკუმულირებული იქნება მუნიციპალური განვითარების ფონდში, რომელიც გამოაცხადებს ტენდერებს და გააფორმებს ხელშეკრულებებს შემსრულებელ კომპანიებსა და ორგანიზაციებთან.

სწორედ, ამ უკანასკნელი პირობის მიხედვით ზუგდიდის რაიონში დევნილთა სახლების სარეაბილიტაციო სამუშაოების ჩატარების უფლება შპს “ბლოკ-ჯორჯიამ” მოიპოვა.



გაზიარება
Read more

ცრუ რწმენების არ მჯერა


მიუხედავად იმისა, რომ სერიალში აღარ ჩანს, ეს ადამიანი საზოგადოებისთვის მაინც "შუა ქალაქის" თიკად რჩება. ლელა მებურიშვილი ახლა სრულიად განსხვავებულ როლზე მუშაობს, გამომძიებელს თამაშობს. მსახიობს ფობიებზე სასაუბროდ დავუკავშირდით, მაგრამ ეს ერთი შეხედვით ნაზი გოგონა საკმაოდ მამაცი და უშიშარი აღმოჩნდა.

- ლელა, ზოგადად, რისი გეშინია?
- აუ, არ ვიცი. შეცდომების მეშინია. არ მიყვარს არასწორი ნაბიჯის გადადგმა, მით უმეტეს, თუ ეს ვინმეს ავნებს. ყოველთვის ბევრს ვფიქრობ, სანამ რამეს გავაკეთებ, რადგან ხშირად გვეშლება ადამიანებს რაღაც-რაღაცები. შეიძლება, ვიღაცამ თქვას, ყველა ადამიანს ეშლება და რა მოხდა, შენც შეგეშალოსო, მაგრამ როცა თუნდაც პატარა შეცდომა მომდის, საშინელი შეგრძნება მეუფლება, ამიტომ ვცდილობ, ჯერ კარგად დავფიქრდე.

- თუმცა შეცდომებისგან დაზღვეული არავინ არის...
- კი, მაგრამ რისი თავიდან აცილებაც შესაძლებელია, ის არ უნდა გააკეთო.

- რას ნანობ ცხოვრებაში?
- კონკრეტულად ვერ გეტყვი, მაგრამ ასეთი შემთხვევებიც ყოფილა. თუ რაღაცაზე გავიფიქრებ მაინც, რომ არ უნდა გავაკეთო, მაგრამ მაინც ვაკეთებ, მერე აუცილებლად ვნანობ. ელემენტარულ მაგალითს გეტყვი, შეიძლება, მეგობრების წრეში სადმე წასვლა შემომთავაზონ, შეიძლება ვიფიქრო, არ ღირს ჩემი იქ წასვლა, მაგრამ თუ მაინც წავალ, მერე ვნანობ (იცინის), მგონი, ინტუიცია რაღაც დონეზე მაინც მაქვს განვითარებული.

- კარგი, მოდი გადავიდეთ უშუალოდ ჩვენი რუბრიკის თემაზე და გვითხარი, რაიმე ფობია თუ გაქვს, სიბნელის თუ გეშინია...
- სიბნელე მიყვარს, მამშვიდებს და მსიამოვნებს. ადრე შუქი რომ ქრებოდა, მომწონდა, რადგან სიწყნარე იყო (იცინის).
- ცხოველების, მწერების მიმართ როგორი დამოკიდებულება გაქვს?
- ნორმალური, ქვეწარმავლები, რა თქმა უნდა, სასიამოვნო არ არის, მაგრამ მათ ხსენებაზე შიში არ მიპყრობს. არადა, მყავს მეგობრები, რომლებსაც თაგვი ან ობობა რომ უხსენო, ოთახიდან გაცვივდებიან.
- ღამურებისაც არ გეშინია?
- ნამდვილად შემეშინდება, ჩემს ოთახში რომ შემოფრინდეს, ალბათ ვიყვირებ და საშველად ვინმეს დავუძახებ (იცინის). ვაიმე, აი, ახლა ბუზი შემოფრინდა, ძალიან დიდია და საშინლად ბზუის, რომ დამაჯდეს, ალბათ გული გამისკდება. სხვათა შორის, ბავშვობაში ძალიან მეშინოდა ლეკვების, კნუტების, წიწილისაც კი, ახლოს რომ მოეყვანათ, კივილს ვიწყებდი. რაც გავიზარდე, ეს დამოკიდებულება შემეცვალა.
- ლელა, ფრენისა და სიმაღლის თუ გეშინია?
- ფრენის არა, მაგრამ ძალიან მაღალ შენობაში ბოლო სართულზე და თან საშიშ, გადმოსავარდნ ადგილზე რომ ვიყო, შემეშინდება.

- ექსტრემალური გართობის მოყვარული თუ ხარ?
- ხშირად მიფიქრია, რომ დიდი სიამოვნებით გადმოვხტებოდი პარაშუტით, მგონია, რომ ძალიან სასიამოვნო იქნება, თუმცა ამის გაკეთების საშუალება არასდროს მქონია. გარდა ამისა, ძალიან მიყვარს სიჩქარე, ზღვაზე ყოფნისას სკუტერით სწრაფად სიარულზე ვგიჟდები, ვფიქრობ, ესეც ექსტრემია.

- გადავინაცვლოთ ექიმებზე, მათ მიმართ როგორი დამოკიდებულება გაქვს?
- ჯერჯერობით ექიმთან ისეთი შეხება არ მქონია, რომ საშინლად არასასიამოვნო ყოფილიყო ჩემთვის. მამაჩემი ექიმია და ბავშვობაში მეც ექიმობა მინდოდა, თეთრი ხალათით დავდიოდი ყველგან. აქედან გამომდინარე, ექიმების არ მეშინია, მეტიც, წელიწადში ერთხელ, არაფერიც რომ არ მაწუხებდეს, სტომატოლოგთან მაინც მივდივარ პროფილაქტიკის მიზნით.

- მოკლედ, უშიშარი ყოფილხარ, მაგრამ მაინც უნდა გკითხო ბუნებრივი მოვლენების - მიწისძვრის, ელვის, ჭექა-ქუხილის შესახებ...
- ძალიან დიდი წვიმა, თქეში, გრუხუნი და ელვა კი არ მაშინებს, მსიამოვნებს, სიგიჟეა, მაგრამ ასეა, ჭექა-ქუხილიც კი მსიამოვნებს, შიშს არ მგვრის (იღიმება). ბავშვობაში ვლოცულობდი ხოლმე, ღმერთო, მიწისძვრა, წყალდიდობა და ა.შ. ყველა ბუნებრივ მოვლენას სათითაოდ ჩამოვთვლიდი და ღმერთს ვევედრებოდი, ასეთი რაღაც არ მომხდარიყო, რადგან ძალიან მეშინოდა, დღეს კი ვიცი, რაც მოსახდენია, ის მაინც მოხდება და მე ვერაფერს შევცვლი.
- ანუ, ბედისწერის გჯერა?
- ამას ბედისწერას არ ვარქმევ, უფრო ღვთის ნებაა.

- აქვე მინდა, ციფრებზეც გკითხო, მათ მიმართ ხომ არ გაქვს რაიმე ცრურწმენა, 13-ის შესახებ გავრცელებული აზრი ალბათ შენც კარგად მოგეხსენება...
- არა, არანაირი გართულება არ მაქვს. საერთოდ, ცრურწმენების არ მჯერა, მათ სპეციალურად ვარღვევ.

- როგორც მივხვდი, ფობია არ გაქვს, მაგრამ როგორ ფიქრობ, ეს რა არის - შიში, აკვიატება თუ ადამიანის სუსტი მხარე?
- ჩემი აზრით, ფობია აკვიატებაცაა და სისუსტეც, მაგრამ მგონია, რომ აკვიატება უფროა, რადგან ამას ფსიქოლოგები ხშირად ერთი სეანსითაც შველიან. მე რომ რაღაც ფობია მქონდეს, აუცილებლად შევეცდები დავძლიო, არ მიყვარს, როცა რაღაცაზე დამოკიდებული ვხდები.
- ძლიერი ნებისყოფის ადამიანი ხარ...
- ვცდილობ, ვიყო. რაღაცას თუ დავისახავ მიზნად, ბოლომდე ვიბრძვი მის სისრულეში მოსაყვანად.

[ჟურნალი "რეიტინგი"]


გაზიარება
Read more

გადმოწერე "ღია ბოქლომი!


გამოვიდა სამეგრელო–ზემო სვანეთის მხარის პოლიტიკური ჟურნალის „ღია ბოქლომის“ ახალი ნომერი. გამოცემის შეძენა დღეიდან საქართველოში არსებულ ყველა პრესის ჯიხურშია შესაძლებელი.

ჟურნალის მიზანია საზოგადოების ყველა წევრისთვის ხელმისაწვდომ ფასად თვის მანძილზე განვითარებული ყველა საინტერესო სიახლის მიწოდება და ამავე დროს დიდი სარეკლამო ბაზრის მოპოება.

იკითხეთ "ღია ბოქლომი" და გჯეროდეთ თავისუფალი სიტყვის!

Read more

წმ. გიორგობა




ქრისტეს მიერ საყვარელნო მამანო და ძმანო!

დღეს მთელ ქრისტიანულ სამყაროსთან ერთად ვდღესასწაულობთ ქრისტეს მოწამეთა შორის მანათობელი ვარსკვლავის, ზეციურ ანგელოზთა შორის გაბრწყინვებულისა და კაცთა შორის ქებულის - ქრისტეს დიდი მოწამის წმიდა გიორგის ხსენებას. კურთხეულია ეს დღე ყველა მართლმადიდებელი ქრისტიანისათვის, მაგრამ იგი განსაკუთრებით სასიხარულო და მნიშვნელოვანი მაინც ჩვენთვისაა - იმ ქვეყნის მკვიდრთათვის, რომელსაც წმ. გიორგის დიდი სიყვარულის გამო „გეორგიას“ უწოდებენ უცხოელნი. დიახ ძმანო, წმიდა გიორგობა ჩვენი ეროვნული დღესასწაულია, ჩვენი ერისა და ეკლესიის ზეიმიცაა.

დაილოცოს განგება ღვთისა, ვინ ჴასწვდება მის სიღრმესა და სიდიადეს. წმიდა გიორგი ჩვენმა ხალხმა რომ ასე დიდად შეიყვარა, არ მოხდა მარტო ჩვენი ნებით და შემთხვევით. ეს მოხდა ღვთის განგებითა და ლოცვა-კურთხევით. ჩვენს არს არც სხვა დიდი წმიდანისათვის დაუკლია სიყვარული და პატივისცემა, მაგრამ წმიდა გიორგისადმი მაინც გამორჩეული სიყვარული და ერთგულება გამოიჩინა. საქართველოში არც ერთი წმიდანის სახელზე არ აუგიათ იმდენი ეკლესია-მონასტერი, რამდენიც წმიდა გიორგისათვის. არც ერთ ქვეყანაში არ აღნიშნავენ წმიდა გიორგობას ისე მრავლად, როგორც საქართველოში. რით უნდა აიხსნას ეს გარემოება, ძმანო? რატომ შეიყვარა და შეითვისა უცხო ტომის წმიდანი ასე ძლიერ ჩვენმა ხალხმა? იმიტომ, რომ ჩვენს ერს, ჩვენს კურთხეულ ქვეყანას, ღვთისგან გამორჩეულს მძიმე და წინააღმდეგობებით სავსე გზით უნდა ევლო. ქრისტეს გზით მიმავალ ჩვენს ქვეყანას უამრავი ბრძოლა და განსაცდელი უნდა გადაეტანა და მხოლოდ მათი ღირსებით დათმენის შემდეგ ელოდა გამართლება და ღმერთთან ამაღლება. ქართველ ხალხს ამ უმძიმესი ჯვარის ზიდვა მარტოს გაუძნელდებოდა. მხოლოდ საკუთარი ძალებით ქართველობა ვერ გაუმკლავდებოდა იმ ურიცხვ მტერს, დღენიადაგ რომ ეხვია გარს. ეს იცოდა ყოვლისმცოდნე უფალმა ღმერთმა და ამიტომ დაბადა ჩვენს ხალხში უდიდესი სიყვარული და პატივისცემა ისეთი ძლევამოსილი და საკვირველთმოქმედი მოწამისა, როგორიც იყო წმიდა დიდმოწამე გიორგი - წმიდანი მებრძოლი და გმირი. სწორედ ასეთი წმიდანი და მეოხი ესაჭიროებოდა ჩვენს ხალხს, თავად მებრძოლსა და მეომარს. წმიდა გიორგის სიყვარულმა განაძლიერა ჩვენი ერი უსჯულო მტრების წინააღმდეგ საბრძოლველად; წმიდა გიორგის სიყვარულმა გააკეთებინა ჩვენს ხალხს შეუძლებელი - გადაირჩინა თავისი თავი და დამოუკიდებლობა. წმიდა დიდმოწამე გიორგის მიმართავდა განსაცდელის ჟამს დიდი და პატარა, ერი და ბერი და წმიდანიც არ აკლებდა მეოხებას თავის რჩეულ შვილებს. წმიდა გიორგით მოხდა ქართველთა ყველა დიდი გამარჯვება ბოროტ ძალებზე. წმიდა გიორგის მეოხებით უნდა მოხდეს მომავალში ჩვენი ხსნაც.

ამიტომ, საყვარელო ძმანო, მოვედით და შევთხოვოთ დიდებულ წმიდანს: ტყვეთა განმათავისუფლებელო, და გლახაკთა ხელის აღმპყრობელო, სნეულთა მკურნალო, და მეფეთა უძლეველო წინამბრძოლო, ღვაწლით შემოსილო დიდო მოწამეო გიორგი, ევედრე შენგან შეყვარებულ ქრისტე მაცხოვარს, რომ დაიფაროს და დაიცვას ერი და ეკლესია ჩვენი ბოროტისა და განსაცდელისაგან; განაძლიეროს და განამტკიცოს მართალი სარწმუნოება ჩვენში, რომ სარწმუნოებით განმტკიცებულნი და გაძლიერებულნი ღირსნი გავხდეთ მართალთა თანა დამკვიდრების, ქებისა და გალობისა ყოვლად პატიოსნისა სახელისა მამისა და ძისა და წმიდისა სულისა, აწ და მარადის და უკუნითი უკუნისამდე, ამინ!

[1982 წ. სამთავრო, მთავარეპისკოპოსი ზოსიმე (შიოშვილი)]

Read more

საინტერესო, ლამაზი და ხალისიანი...


აპრილის ერთ წვიმიან დღეს, კომპანია "არტ-ფეისმა" თბილისური ბომონდი ავთანდილის 2010 წლის ზაფხულის კოლექციის ჩვენებაზე მიიწვია. საღამო ვაკის საცურაო აუზზე გაიმართა, რამაც იმ მოღუშულ დღეს ვფიქრობ, სიცოცხლე და ხალისი ნამდვილად შესძინა, რადგანაც აუზზე მისული სტუმრები, ღონისძიების ორგანიზატორების მიერ სპეციალურად ჩვენებისთვის შექმნილი მიკროკლიმატის წყალობით, სწორედ რომ საზაფხულო განწყობილებას მაშინვე იქმნიდნენ... ნამდვილად არ ვიცი, რა სიგრძე-სიგანისაა აღნიშნული აუზი, მაგრამ იქ მისულმა მაშინვე შევნიშნე, რომ მასში საგანგებოდ ჩაედგათ სპეციალური რკინის კონსტრუქცია, რომელზეც პოდიუმი აეგოთ... ჟღერდა მუსიკა, სტუმრებით თანდათან ივსებოდა სივრცე, მათ შორის - ბევრი ცნობილი ადამიანი მოდიოდა... ვაკის აუზზე მეგობრებთან ერთად, პოლიტიკაში ახალგადაბარგებული ჟურნალისტი - ინგა გრიგოლიაც გამოჩნდა, რომელმაც მითხრა, რომ მთელ დღეებს მოსახლეობასთან შეხვედრებს ანდომებს და რომ მისი ახალი საქმიანობა არც ისე იოლია... თუმცა მისი მოუცლელობის მიუხედავად, ინგა უახლოეს მომავალში, ვრცელ ინტერვიუზე იქვე შევიპირე და ჩვენების ორგანიზატორებისკენ გავემართე, მაგრამ უნებლიეთ პირველად გასაუბრება საღამოს მთავარ "დამნაშავე" - ავთანდილთან გამომივიდა. - ავთო, არ ისვენებ, ხომ?
- არა (იცინის)... აუზი, წყალი, ზაფხული, ლამაზი ფერები, მაგარი მუსიკა, კარგი გოგონები, ახალი კოსტიუმები, შესანიშნავი განწყობილება, გემრიელი სასმელი, მშვენიერი საზოგადოება - მითხარი, რით არის ცუდი?

- მაგარია!
- ამიტომ, დღეს აქ დიდი სიამოვნებით წარვადგენ ჩემს ახალ კოლექციას, რომელშიც მთელი გული ჩავდე...

- ამ კოლექციის ნახვა მეც ძალიან მაინტერესებს...
დიზაინერთან ამ მოკლე საუბრის შემდეგ, კულისებში სამოდელო სააგენტო - "არტ-ფეისის" ხელმძღვანელთან - ლალი ტოტიკაშვილთან გადავინაცვლე. როგორც გავარკვიე, "შარმის" დახურვის შემდეგ, ლალი ამ ახალ სააგენტოს ჩასდგომია სათავეში და დიდი მონდომებით მუშაობს თავის მოდელებთან (ჰო, მართლა, ჩემს თანამოსაუბრეს ვარდისფერი საღამოს კაბა ავთანდილის კოლექციიდან, ძალიან უხდებოდა)...

ლალი ტოტიკაშვილი:
- ამ ჩვენებისთვის დიდი ხნის განმავლობაში ვემზადებოდით. დღეს კი მაყურებლის წინაშე ჩვენი სააგენტოს 17 მოდელი გამოვა. იმის გამო, რომ საზაფხულო-საპლაჟო, საღამოს კაბებია წარსადგენი, ადგილიც სპეციალურად შეირჩა. აუზში საგანგებოდ ჩადგმულ პოდიუმზე გოგონებმა ფეხშიშველებმა უნდა გაიარონ...

ის იყო, ლალისთან ინტერვიუ დავასრულე, მოვბრუნდი და იქვე ადამიანების ჯგუფი შევნიშნე, რომელიც დიზაინერ მაკა ასათიანის გარშემო შეკრებილიყო. ისინი მაკას მოულოდნელ გამოჩენას საოცრად გაეხარებინა. ულამაზესი ქალბატონი, როგორც ყოველთვის, შესანიშნავ ფორმაში იყო... ჰოდა, მეც მათ შევუერთდი...

თეონა თავართქილაძე:
- მართალია, გარეთ თავსხმა წვიმაა, ცუდი ამინდია და ცივა, მაგრამ როგორც კი აქ შემოვედით, ყველანი მაშინვე კარგ განწყობილებაზე დავდექით. ავთო საზაფხულო კოლექციის წარმოდგენას აპირებს. ძალიან მომეწონა იდეა, რომ ჩვენება აუზზე გაემართათ, ადგილი სწორად შეურჩევიათ... ჩემს კარგ განწყობილებას კიდევ ის აძლიერებს, რომ დღეს მაკაც ჩამოგვივიდა და ის, თქვენთან ერთად, მეც ახლა პირველად ვნახე... ასე რომ, ველი კარგ სანახაობას, რომელიც გველოდება...

- თავად როდის გეგმავ შენს მორიგ ჩვენებას?
- სულ მალე, 6 მაისს...

მაკას აზრის მოსმენაც მინდოდა, მაგრამ მითხრა, - ჩემს შთაბეჭდილებას ჩვენების შემდეგ გაგიზიარებო... სამაგიეროდ, ჩვენებამდე გასაუბრებაზე დიზაინერ ბიჭოლას, უარი არ უთქვამს, რომელიც იქ თავის მუზასთან, 15 წლის ულამაზეს ნანა გუდავაძესთან ერთად გახლდათ მოსული.

- ლალი ტოტიკაშვილთან დიდი ხნის მეგობრობა მაკავშირებს, ამიტომ მის მიერ მოწყობილ ნებისმიერ ღონისძიებას ყოველთვის სიამოვნებით დავესწრები.
- მართალია, რომ შენი მუზა - ნანა გუდავაძე გახდა შენი ახალი კოლექციის სახე?
- დიახ, ასეა. ეს არაჩვეულებრივი გოგონა, სამოდელო სააგენტო "ამსას" აღმოჩენაა და სწორედ მისგან არის შთაგონებული ჩემი ახალი კოლექციაც.

- როდის გეგმავ საკუთარი ჩვენების მოწყობას?
- ჯერჯერობით მუშაობის პროცესში ვარ...

- ისე, საკმაოდ უცნაური იმიჯი გაქვს...
- ლონდონში ცხოვრების შემდეგ ძალიან შევიცვალე მეც და შესაბამისად - ჩემი იმიჯიც...
აი, დაიწყო კიდეც ავთანდილის კოლექციის დემონსტრირება... მართლა ლამაზი სანახავი იყვნენ სხვადასხვა ფერის, საზაფხულო სამოსში გამოწყობილი, პოდიუმზე ფეხშიშველი მოსიარულე მოდელები... მოდის მოყვარულებმა დიზაინერის სულ 34 კოსტიუმი იხილეს... ბოლოს, პოდიუმზე, "პაკლონისთვის" ავთანდილიც გამოჩნდა. შემდეგ კი, მისალოცად, კულისებისკენ მაყურებლები გაემართნენ. მათ შორის, ერთ-ერთი პირველები - მაკა ასათიანი და თეონა თავართქილაძე გახლდნენ.

მაკა ასათიანი:
- არაჩვეულებრივი სანახაობა იყო. ძალიან მომეწონა. მოდი, ამ ყველაფერს ასე დავახასიათებ -საინტერესო, ლამაზი და ხალისიანი... საზაფხულო განწყობილებას ნამუშევრები ნამდვილად შეესაბამებოდა.

- ავთანდილის მიერ შექმნილი სამოსი შენს გარდერობში თუ მოიძებნება?
- კი...

- თვითონ არ აპირებ მოდის სფეროში დაბრუნებას?
- (ღიმილით) არა...

- დაუჯერებელია, შენი ჩვენება ჩვენ მოგვენატრა და პროფესიონალი ამას როგორ ამბობ? (იღიმის). ბოლოს უცხოეთში რამდენი ხნით იყავი წასული?
- ერთი თვით. აქ ცოტა ხანს ვიქნები და ისევ წავალ...

- თბილისში რომ ჩამოდიხარ, დროს ძირითადად, რას უთმობ ხოლმე?
- მეგობრებს, ოჯახს... განსაკუთრებულს არაფერს - მოკლედ, ძველი საქმიანობით ბოლო დროს აღარ ვარ დაკავებული...

იმ საღამოზე, კიდევ ერთი, საქართველოდან დიდი ხნით წასული მომღერალი აღმოვაჩინეთ, რომელიც ნაცნობ-მეგობრებს სითბოს უნაწილებდა. ეს თამუნა ამონაშვილი გახლდათ.

- საქართველოდან 2 წელი და 4 თვე ვიყავი წასული. თბილისში ცოტა ხნის წინ ჩამოვედი. აქაურობა მართლა ძალიან მომენატრა.

- გამგზავრებას კიდევ აპირებ?
- კი. და ძალიან მიხარია, რომ ისევ თქვენთან ერთად ვარ. დღეს აქ ადამიანებისგან იმდენი სითბო და სიყვარული მივიღე და თავადაც გავეცი, რომ ემოციებს ვერ ვთოკავ... მოკლედ, ძალიან ბედნიერი ვარ... ამასთან, ძალიან მიყვარს ავთო ცქვიტინიძე. ის ყოველთვის ორიგინალურობით გამოირჩევა. ამიტომაც იყო, რომ ეს ჩვენება ასეთი ორიგინალური გამოუვიდა...

აზრი მსახიობ ია ფარულავასთვისაც რომ არ მეკითხა, ალბათ აუზის ტერიტორიას ისე ვერ დავტოვებდი. ია ჩვენების შემდეგ, დაქალებთან ერთად იჯდა და საუბრობდა.

- ნამდვილად კარგი კოლექცია იყო. აგერ ზაფხულიც კარს მოგვადგა და ავთანდილისგან დროული იყო ამ კოსტიუმების წარმოდგენა. ხომ უნდა გვენახა ის, თუ რას გვთავაზობს ავთანდილი ზაფხულში?..

- მერე საზაფხულოდ რომ არ ხარ ჩაცმული?
- გარეთ ცივა, წვიმს, მაგრამ აქ შემოსული მართლა გავთბი და გავხალისდი...


[ლალი ფაცია, ჟურნალი ”გზა”]
Read more

ირაკლი ბათიაშვილი ბაბუაა


პოლიტიკოს ირაკლი ბათიაშვილის ქალიშვილი ირინა და ყოფილი დეპუტატის, ვალერი გელაშვილის ვაჟიშვილი ვალერკა მშობლები გახდნენ. პატარა ვალერი,
რომელსაც მამიკოს და ბაბუის სახელი დაარქვეს, ლიტვაში დაიბადა, სადაც ახალგაზრდა წყვილი ცხოვრობს.

შეგახსენებთ, ირინამ და ვალერკამ 2009 წლის 20 სექტემბერს იქორწინეს. შვილიშვილის შეძენით გახარებული ირაკლი და მაია ბათიაშვილები ლიტვაში გაემგზავრნენ. ვულოცავთ ირინას და ვალერკას ვაჟიშვილის შეძენას.

[ ”ყველა სიახლე” ]
Read more

3 ადამიანის მკვლელი "იმედი"


ტელეკომპანია „იმედის“ ეთერში 13 მარტს გაშვებულმა ე. წ. მოდელირებულმა „ქრონიკამ“, რომელმაც რუსეთთან ომის განახლების შესახებ გვამცნო, მორალური ზარალის გარდა, მოსახლეობას ფატალური შედეგებიც მოუტანა. მართალია, დაღუპულთა ზუსტ რაოდენობაზე პრესაში სხვადასხვაგვარი ინფორმაცია ვრცელდება, მაგრამ გამოიკვეთა 3 ოჯახი, სადაც აცხადებენ, რომ მათი წევრი „მოდელირებულ“ „ქრონიკას“ ემსხვერპლა.

„იმედის“ სიუჟეტის ერთ-ერთი მსხვერპლი დუშეთის რაიონის სოფელ არაგვისპირის მცხოვრებია. 50 წლის გაიოზ ოდიშელიძე გულის შეტევით გარდაიცვალა.

„სიუჟეტის მსვლელობის დროს წამოიყვირა - ეს რა ხდებაო, შემდეგ გულში ტკივილები იგრძნო და ძირს უგონოდ დავარდა“, - აცხადებს გარდაცვლილის შვილი, ალეკო ოდიშელიძე. მან სასწრაფო დახმარება მაშინვე გამოიძახა, მაგრამ ექიმებმა ავადმყოფის გადარჩენა ვერ შეძლეს.

„იმედის“ სიუჟეტის კიდევ ერთ მსხვერპლზე ინფორმაციას რუსული სააგენტო - „იტარ-ტასი“ ავრცელებს - თბილისში მცხოვრები სოხუმიდან დევნილი, 75 წლის ვანო ნასარიძე ინსულტით გარდაიცვალა.

ნასარიძის ახლობლების ცნობით, ავადმყოფი კვირას თბილისის ერთ-ერთ საავადმყოფოში მიიყვანეს, სადაც მას მძიმე და ხანგრძლივი ოპერაცია ჩაუტარდა. ოპერაციის შემდეგ ვანო ნასარიძემ მხოლოდ რამდენიმე დღეს იცოცხლა.

„მოდელირებული“ „ქრონიკის“ ფატალურ შედეგებზე ინფორმაციას „კახეთის საინფორმაციო ცენტრიც“ ავრცელებს. ცენტრის ინფორმაციით, ყვარელში 65 წლის ჯ. მ...შვილს „მოდელირებული“ „ქრონიკის“ ნახვის შემდეგ გული გაუსკდა და გარდაიცვალა. ცენტრს ეს ინფორმაცია გარდაცვლილის მეზობლებმა მიაწოდეს, ვინაობის საჯაროდ გამხელა კი არ ისურვეს.

„14 მარტს, დილით გავიგეთ, რომ წინა საღამოს ავად გამხდარა. ომზე რომ გაავრცელეს ტყუილად ინფორმაციები, იმას უყურა და შეტევა ჰქონია. 15 მარტს სტენოკარდიული შეტევა დაემართა, სასწრაფო სამედიცინო დახმარების ბრიგადამ ყვარლის საავადმყოფოში გადაიყვანა, მაგრამ მძიმე მდგომარეობაში იყო და თბილისში გაწერეს. ექიმებმა მისი გადარჩენა ვერ შეძლეს, გული გაუსკდა“, - აღნიშნეს გარდაცვლილის მეზობლებმა.

„მოდელირებული“ „ქრონიკის“ შედეგად დაზარალებულებს იურიდიულ დახმარებას არასამთავრობო ორგანიზაციები უწევენ. ახალგაზრდა იურისტთა ასოციაციაციის ადვოკატის, კახა კოჟორიძის განცხადებით, მათ დახმარებისთვის ერთმა ადამიანმა მიმართა. ადვოკატი დაზარალებულის ვინაობას არ ამხელს.

„ჩვენ ერთმა დაზარალებულმა მოგვმართა, რომელიც სიუჟეტის ნახვის დროს შეუძლოდ გახდა. იგი მორალურ კომპენსაციას ითხოვს. მის სარჩელს სასამართლოში უახლოეს დღეებში შევიტანთ“, - აღნიშნა საიას ადვოკატმა.

ერთი დაზარალებულის წერილობითი საჩივარი კომუნიკაციების ომბუდსმენთან, დავით ებრალიძესთანაც არის შეტანილი. დაზარალებულის ვინაობას არც ებრალიძე ამჟღავნებს.

სხვა არასამთავრობო ორგანიზაციებს წარმოებაში ჯერჯერობით არც ერთი საჩივარი არ მიუღიათ. არ ვრცელდება ინფორმაცია, მიმართა თუ არა რომელიმე მოქალაქემ კერძო ადვოკატურას. რაც შეეხება გარდაცვლილებს, ჯერჯერობით მათი ოჯახის წევრებიც არ ჩივიან. თუმცა, დარწმუნებით აცხადებენ, რომ მათი ნათესავების გარდაცვალება ომის გამოგონილმა სიუჟეტმა გამოიწვია.
Read more

ფსიქოლოგია – მეორე უკიდურესობა



გაგაცნობთ ხელმოკლე ოჯახში მოზარდის აღზრდის რამოდენიმე მოსაზრებას სამწუხაროდ, ჩვენს ირგვლივ, ბევრი ღარიბი, ადამიანი ცხოვრობს. ყოველ მათგანს თავისი საზრუნავ-საწუხარი აქვს. ლოგიკურია, რომ ჩვენი ტკივილი სხვისაზე მეტად მტკივნეულია. იმდენად ვართ ჩაფლული ყოველდღიურ რუტინულ შრომაში, რომ ხშირად თავის აწევა და გარშემო მიმოხედვაც გვავიწყდება. ეს იმიტომ, რომ ჩვენთვის ცხოვრების ტვირთი წისქვილის ქვის სიმძიმედ ქცეულა. ამ ტვირთს ზიდვა და გაძლება უნდა. ამის გამო ცხვირი ლამის მიწას დაგვიბჯენია.

ცისკენ და ღმერთისკენ ახედვა ფიქრადაც არ მოგვდის. კვირას უამრავი საქმე გვიგროვდება და ამიტომ ტაძარში წასასვლელად, არ გვცალია, თუ კარგად არ შეგაჯანჯღარეს სატირალსა და საცინარში ოფიციალურად არ მიგვიწვიეს გარშემომყოფებზე ზრუნვა კია რა ოჯახის მიღმა ადამიანების არსებობაც არ გვაგონდება. ზოგიერთი მათგნი თავისი კრიტიკით ან მოთხოვნით, რომ არ გვაწუხებდეს, ჩვენს მოვალეობებს არ გვახსენებდეს. რა ვქნათ, ძალიან დატვირთულნი და დაღლილ-დაქანცულნი ვართ. ხედავს ამას ჩვენი შვილი და თვითონაც უდარდელი იზრდება. ჩვენსავით ცხვირს იქით ვერავის ამჩნევს, მხოლოდ იმას ხედავს, მისი მეზობლის ბავშვს, რომ უკეთ აცვია და უკეთესი მობილური ტელეფონი უჭირავს. ჩვენ ჩვენი სადარდელი გვაქვს, მას _ თავისი. ჩვენ ვცდილობთ ოჯახში ლუკმა-პური შემოვიტანოთ, ის-ხვდება, რომ უფროსებმა მასზე უნდა იზრუნონ. კარგად აქვს გაცნობიერებული თავისი უფლებები, მაგრამ მოვალეობები ხშირად ავიწყდება. ავიწყდება, რომ ბიჭი მოვალეა დედა და მამა დაიცვას, მამას მხარში ამოუდგეს. არც არის გასაკვირი, ის ხომ ჯერ კიდევ უასაკოა. ჰოდა სწორედ აქ არის ჩვენი დროული ჩარევა აუცილებელი. დროული და არა დაგვიანებული.

ბავშვს, გოგოსაც და ბიჭსაც საწყის ეტაპზე, ადრეული ასაკიდან ჯერ თვითმომსახურება ვასწავლოთ. მერე პატარა დავალებები მივცეთ. ეს მაგიდაზე დადე; ის მომოტანე; კარი დახურე ან გააღე; მომაწოდე დამიწირე, აიღე გადასწიე გადადგი..) როცა პატარა იღლება ვეფერებით ნატკენ ადგილზე ვკოცნით, მასაჟს ვუკეთებდთ, მხრებსა და პატარა კიდურებზე ველამუნებით. მას ეს ძალიან მოსწონს. როცა ჩვენ დაღლილი ვართ ვთხოვოთ, მასაჟი გაგვიკეთოს, მოგვეფეროს, რომ დაღლილობამ გადაგვიაროს. ამ შემთხვევაში ჩვენ ორ კურდღელს ერთად ვიჭერთ. პირველს უფრო პატარას, რომ ჩვენზე ზრუნავენ; მეორეს კი გაცილებით დიდს_ჩვენ შვილს გარშემომყოფებზე ზრუნვას ვასწავლით. პატარა ადამიანი თანდათან სწავლობს დედაზე, მამაზე უმცროს და-ძმაზე ზრუნვას. ჩვენ რათქმაუნდა მას წავახალისებთ, ხშირად ვაქებთ, რომ შვილი მოგვესწრო და ძალიან გვეხმარება, ცხოვრებას გვიმსუბუქებს. პატარების აღზრდაშიც გვშველის. დროდადრო მეზობლებსაც შეიძლება მივაშველოთ, მოხუც მეზობელს ტვირთის წაღებასა თუ პურის მოტანაში მივახმაროთ. აქაც ორ საქმეს ვაკეთებთ. სხვასაც ვეხმარებით და შვილსაც ადამიანად ვზრდით შრომის ელემენტებს ვაზიარებთ. რაც უფრო გაიზრდება ვასწავლოთ მოზარდს გაჭირვებული ადამიანების ჩვენზე ღარიბების დახმარება. ჩვენ დღეს ღმერთმა ორი პური მოგვცა. იქნებ სხვას ერთიც არა აქვს. თუ გვინდა მეტი მოგვცეს ჩვენც უნდა გავიღოთ. ყველა ღარიბ ოჯახშია ერთი ზედმეტი კალამი ან ფანქარი ჩვენზე ღარიბებისათვის. მათხოვრის გაკითხვა კი ჩვენი მოვალეობაა. უფალი გვეუბნება, მათხოვარს არ დაეხმარე, ეს ნიშნავს, რომ მე არ შემეწიე. ჩვენზე შეჭირვებული სამწუხაროდ ჯერაც ბევრია თუ შეძლებისდაგვარად შვილს სხვის სიღარიბეს დავანახებთ, ვასწავლით მათზე ფიქრსა და ზრუნვას, აქცენტს მდიდარი მეზობლის ქონებასა და ფუფუნებაზე არ გავაკეთებთ, მას გული აღარ გაუსკდება სხვისი სიკეთისა და ქონების გამო. იმიტომ, რომ თუ დღეს შრომითა და ჯაფით აქვს მოპოვებული, მის სულსა და გულში სითბო და სიყვარული დაისადგურებს. შურის ბოღმისა სიბოროტის ადგილი აღარ დარჩება. ჩვენი ხმა მიზანს მიაღწევს. „ჩვენვე მოზარდის კეთილშობილ გულში და არ იქცევა „ხმად მღაღადებლისა უდაბნოსა შინა”.

მინდა გაგაფრთხილოთ, ვასწავლოთ მოზარდს, რომ ზრუნვა სისტემატურ ხასიათს უნდა ატარებდეს. სადღესასწაულო ქველმოქმედებას არ უნდა ჰგავდეს; არც სატელევიზიო პიარაქციებს: აღდგომას, რომ უპატრონო ბავშვებს ერთ პასკასა და რამოდენიმე წითელ კვერცხს ვჩუქნით და აუცილებლად მსოფლიოს თუ არა მთელ საქართველოს მაინც გავაგებინებთ აი, რა კარგები ვართო. „კარგი ჰქენი ქვას დადევი“...

[მარინა კვიკვინია, ფსიქოლოგი, ჟურნალი "ღია ბოქლომი"]
Read more

შენც, ბაქო?!


30 მარტს, მოსკოვის მეტროში მომხდარი ტერორისტული აფეთქებების მეორე დღეს, დასავლურმა საინფორმაციო საშუალებებმა გაავრცელეს სკანდალური ინფორმაცია აზერბაიჯანში ტერორისტული აქტის აღკვეთის შესახებ.

„ბიბისის“ რუსულენოვანი სამსახურის მიერ გამოქვეყნებულ ცნობაში, კერძოდ, ნათქვამი იყო, რომ აზერბაიჯანის უშიშროების სამინისტრომ ბაქოს ერთ-ერთ სკოლაში აღმოაჩინა იარაღის სამალავი, რომელშიც ავტომატები, საბრძოლო მასალა და ასაფეთქებელი ნივთიერება ინახებოდა.

პარალელურად, აზერბაიჯანის ეროვნული უშიშროების სამინისტრომ დააკავა რვა პირი, რომლებიც ბაქოში სკოლებსა და საბავშვო ბაღებზე ტერორისტულ თავდასხმებს გეგმავდნენ. ცნობებში ხაზგასმული იყო, რომ ჯგუფი აზერბაიჯანში საქართველოდან შევიდა და მათ ხელთ არსებული მთელი არსენალიც კონტრაბანდული გზით სწორედ საქართველოდან მოხვდა აზერბაიჯანში. ინფორმაციაში მაშინვე მიიქცია ყურადღება ორმა, ერთმანეთისგან საკმაოდ დაშორებულმა, თარიღმა - აღმოჩნდა, რომ სავარაუდო ტერორისტების ჯგუფი ბაქოში ჯერ კიდევ 16 მარტს დაუკავებიათ, მაგრამ აზერბაიჯანის უშიშროების სამინისტრომ ოფიციალური ინფორმაცია ტერაქტის აღკვეთის თაობაზე რატომღაც 30 მარტს, მოსკოვის მეტროში მომხდარი აფეთქებების მეორე დღეს, გაავრცელა.

ბაქოში არსებული არასამთავრობო ორგანიზაცია „აღმოსავლეთ-დასავლეთის კვლევითი ცენტრის“ დირექტორი არასტუნ ორუჯულუ ვარაუდობს, რომ აზერბაიჯანის ხელისუფლებამ ორი კვირის წინ გახსნილი არშემდგარი ტერორისტული აქტი 30 მარტს შეგნებულად წამოსწია და საქართველოზეც ყურადღება მოსკოვის გულის მოსაგებად გაამახვილა:

„პრინციპში, აზერბაიჯანის სპეცსამსხურებმა წინასწარ იცოდნენ, რომ რუსეთის მხარე დაიწყებს ქართული, აზერბაიჯანული ან რომელიმე სხვა ქვეყნის კვალის ძიებას და, უბრალოდ, შეეცადნენ დაეზღვიათ საკუთარი თავი და, ფაქტობრივად, მიუთითეს რა, რომ იარაღი და საბრძოლო მასალა საქართველოდან შევიდა, ამით დე ფაქტო მიუთითეს მეზობელ ქვეყანაზე, რითაც, შეიძლება ითქვას, ირიბად კვერი დაუკრეს რუსეთის სპეცსამსახურებს.“

მოსკოვი გასაგებია, მაგრამ შენც, ბაქო?!

კი, მაგრამ სად წავიდა ილხამ ალიევისა და მიხეილ სააკაშვილის ძმური მეგობრობა, ლეგენდები აზერბაიჯანისა და საქართველოს უღრუბლო სტრატეგიულ პარტნიორობაზე, პრივილეგიები ნავთობკომპანია „სოკარისათვის“, ყბადაღებული საუკუნის მილსადენები, ერთობლივი პროექტი „ნაბუკო“ და, ბოლოს, ნავრუზ-ბაირამი, ზუსტად იმ დროს აყვანილი აწ უკვე საქართველოს სახელმწიფოს ოფიციალური დღესასწაულის რანგში, როდესაც აზერბაიჯანის სპეცსამსახურები, როგორც ორუჯულუ ამბობს, კერავდნენ მორიგი ტერაქტის ვერსიას და ცდილობდნენ კვერი დაეკრათ რუსეთისათვის: ჩვენ რა შუაში ვართ, ტერორისტები და იარაღი საქართველოში ეძებეთო?

ეჰ, არადა, მართლა დასანანია. იყო დრო, როდესაც აზერბაიჯანი, თავისი შინაგან საქმეთა მინისტრის რაულ უსუპოვის ხელით, სპეცდანიშნულების ტექნიკას უგზავნიდა საქართველოს შინაგან საქმეთა მინისტრ ვანო მერაბიშვილს, რათა ქართულ პოლიციას 2007 წლის 7 ნოემბერს საფუძვლიანად დაერბია თბილისის ქუჩებში გამოსული ეგზალტირებული მომიტინგეები. „დავნო პარა“, - მაშინ ამ სიტყვებით უკრავდა კვერს რაულ უსუპოვი ქართველ კოლეგას. „დავნო პარა“, - ახლა რუსეთის უშიშროების საბჭოს მდივანს უკრავს კვერს აზერბაიჯანის სპეცსამსახური და თითს საქართველოსაკენ იშვერს.

მაგრამ ეს იყო სამი წლის წინ, ახლა კი ბაქოსა და თბილისს შორის ურთიერთობა გაცივდა, ბევრი რამის, მათ შორის, სომხეთის ტვირთებისათვის ზემო ლარსი-დარიალის სასაზღვრო გამშვები პუნქტის გახსნის გამო, -ამბობს არასტუნ ორუჯულუ, ბაქოში არსებული არასამათავრობო ორგანიზაცია „აღმოსავლეთ-დასავლეთის კვლევითი ცენტრის“ დირექტორი:

„იყო გაკეთებული განცხადება აზერბაიჯანის საგარეო საქმეთა სამინისტროს მხრიდან, სამი პუნქტისაგან შემდგარი განცხადება, საკმაოდ მკაცრი რეაქცია ზემო ლარსის გახსნაზე. და მე ვფიქრობ, რომ გარკვეული გაციება ურთიერთობისა მოხდა, რაც ჯერ არ გახმაურებულა. თუმცა აქ შეიძლება არსებობდეს მეორე მომენტიც. საქმე ისაა, რომ დღეისათვის აზერბაიჯანი, რომელიც გარკვეულ ზეწოლას განიცდის დასავლეთისაგან, სულ უფრო უახლოვდება ჩრდილოეთ მეზობელს, რუსეთს. და სწორედ ასეთი - ქართული კვალის ძიებით მიღებული - დანაშაული, რომელიც არც მომხდარა, რადგან მხოლოდ იარაღი იპოვეს, შესაძლოა, შემოგდებული იყოს სწორედ ჩრდილოელი მეზობლის მიერ.“

საქართველოს ხელისუფლება გაოგნებულია უახლოესი მეზობლის, აზერბაიჯანის, ასეთი დიპლომატიური ორპირობის გამო, თუმცა ამას არ იმჩნევს. რაიმე მკვეთრი მინიშნება ოფიციალური ბაქოს არამეგობრულ საქციელზე, შესაძლოა, ნიშნავდეს აზერბაიჯანიდან შეტანილი ბენზინის გაძვირებას ან, კიდევ უარესი, თბილისში მცხოვრები რამდენიმე ათასი აზერბაიჯანელის ხმის დაკარგვას კარსმომდგარ ადგილობრივი თვითმმართველობის არჩევნებში. მაგრამ ორცეცხლშუა მყოფ საქართველოს ხელისუფლებას, ალბათ, არ გაემტყუნება. როგორც უნდა იყოს, დიპლომატიაში ნაჩქარევ რეაქციას თავშეკავება სჯობია - მით უფრო, რომ აზერბაიჯანის სპეცსამსახურებმა კვირის ბოლოს ერთგვარად გააფერმკრთალეს „ქართული კვალი“ აღკვეთილ ტერაქტში და შემდგომ ინფორმაციაში ზოგადად მიუთითეს, რომ ქვეყანაში „რეგულარულად ხდება აღკვეთა ტერორისტული აქტებისა, რომელთა სამიზნე ან უცხოეთის ქვეყნების საელჩოებია, ანდა ნავთობგადამამუშავებელი ქარხნები.“

თანაც, ერთ კვირაზე მეტი გადის და არც ერთი სიტყვა არ არის ნათქვამი, თუ რა ეროვნებისაა ის სამი ქალი და ხუთი მამაკაცი, რომლებიც აზერბაიჯანის სპეცსამსახურებმა დააკავეს, როგორც ეჭვმიტანილები.

არა, მეტად ფაქიზია აღმოსავლეთი, მისი სპეცსამსახურები კი - კიდევ უფრო ნატიფი...

[რადიო "თავისუფლება"]
Read more